GAGAL PAHAM TENTANG SHALAT

By: Azhari Agusti, SE., MM

Si Udin jo Si Muin baliak raun-raun kaliliang kampuang, sahinggo mereka tu talambek mangarajoan Sholat Zuhur bajama’ah di Masjid/Mushollah. Si Udin ma ajak Si Muin untuak malakukan Sholat Zuhur bajama’ah di Musajik nan di singgahi nyo dalam perjalanan. Bawudhuk lah merek a tu dan lah siap-siap untuk Sholat bajama’ah. Si Udin manyuruah Si Muin untuak jadi Imam, tapi si Muin malah manyuruah si Udin nan jadi Imam Sholat. Beberapa waktu mereka tu saliang tulak manulak untuak jadi Imam. Akhirnyo si Udin mangalah untuak basadio manjadi Imam sholat Zuhur tu. Raka’at demi raka’at mereka lalui dengan lancar. Pado waktu raka’at terakhir, si Muin yang jadi makmum lah duduak tasyahud akhir, samantaro si Udin nan jadi Imam lanjut tagak baliak untuk melanjutkan raka’at nan kalimo. Si Muin binguang ba a kok si Udin ko tagak lo malanjutkan raka’at nan kalimo, apo dan dima lo dapek ilimu si Udin ko, itu gumam si Muin dalam hati. Akhirnyo si Muin, melanjutkan sajo amalan nan sasuai jo ilimunyo. Salasai mambaco bacaan tasyahud akhir, nyo langsuang salam. Nan nyo padia kan sajo si Udin malanjuik an sholat nyo sampai sudah. Lamo si Muin manantikan si Udin ko salasai Sholat Zuhur, karano si Udin malakukan Sholat Zuhur sampai dengan duo baleh raka’at. Dan setelah salasai si Udin Sholat, mako mereka berdiskusi:

Muin:  Ba a dek balain sholat zuhur ang kini Din.

Udin: Balain ba a Muin. Kan awak lai sholat di waktu nan ditantukan mah.

Muin: Tapi tadi den etong  jumlah raka’at nan ang karajoan di sholat Zuhur ko sampai duo baleh raka’at.

Udin: Tu mangko ang jan lalok se pangana ang tu... kapatang kan ado pengajian di Surau kampuang awak tu... ustadz nyo sabana santiang dan tinggi ilimunyo... patang tu baliau manyampaikan tentang Sholat... baliau manyampaikan supayo kito mampabanyak Sholat... jadii den pikia baso kini kan awak ndak manga-manga do dan ndak takaja-kaja do... mako den karajoanlah sholat Zuhur ko sampai duo baleh raka’at. Supayo dapek pahalo nan banyak... bitu Muin...

Muin: (takakah-kakah dek galak) aaaa iko bukan kaji nan salah Din, tapi wa ang ko lah tamasuak kapado golongan urang-urang nan gagal paham ko mah... bukan baitu caro manterjemahkan dan ma implementasian apo nan alah disampaikan dek Ustadz tu... mukasuik mampabanyak Sholat tu, bukan jumlah raka’at Sholat wajib tu nan ang tambah, sebab kalau mode itu pemahaman ang, aaa bamacam-macam jumlah raka’at urang nan sholat wajib bajama’ah jadi nyo mah. Ndak ado keseragaman salam nan dilakukan oleh urang-urang nan samo-samo mandapek an takbirratul ihram jadi nyo... kalau lah Imam hanyo mangarajoan ampek raka’at, tu sia nan ka mamimpin raka’at barikuiknyo lai Din... bantuak awak tadi, ang taruih Sholat surang sampai raka’at duo baleh , samantaro den hanyo ampek raka’at. Sholat wajib tu jaleh aturan dan syarat nyo Din.

Udin: tu ba a implementasi ceramah ustadz tu manurik ang Muin... cubolah tarangan ka waden ko, supayo waden ko ndak tamasuak kapado golongan urang-urang nan gagal paham tu. Malu waden beko di muko urang rami, apolai kalau waden sumbayang di tampek urang lain, kan jadi malu urang kampuang awak gara-gara amalan nan den karajoan tu...

Muin:  Jadi mode iko mah Din... mampabanyak Sholat tu bukan bararti awak manambah jumlah raka’at Sholat wajib, tapi mukasuik nyo kito mampabanyak sholat-sholat sunat, seperti: sholat Tahajjud, Sholat Dhuha, Sholat Wudhuk, Sholat Tahyatul Masjid, Sholat Qobliyah, Sholat Ba’diyah, Sholat Safar, Sholat Gerhana matahari/bulan, Sholat Hajat, Sholat Mutlak... Singkeknyo, Sholat sunat nan paralu kito pabanyak Din, bukan manambah jumlah raka’at Sholat Wajib Din... bitu Din..

Udin: Ondeh mande... bitu ruponyo implementasi dari apo-apo yang disampaikan ustadz tu... astaghfirullahal ‘adziim... yo lah salah waden ko mah Muin... tarimo kasi ateh sagalo ilimu nan wa ang agiah hari ko... Semoga batambah juo ilimu wa ang andaknyo, sahinggo dapek juo waden katarangan dari wa ang tu... maklum lah Muin, antene waden ko kurang rancak tangkok an sinyal e mah...

Muin: itu lah gunonyo awak basamo dan saliang ma ingek an Din...  bukan mampacikarao an apo-apo yang dikarajoan dek urang lain, nan awak anggap salah Din... kito diskusian elok-elok, apo dasar dari urang tu malakukan amalan nan awak anggap salah tu... bisa jadi inyo tu nan batua mah, tagantuang dari dasar apo nyo mangarajoan amalan tu. Kalau tajadi “Dead Lock” mako paralu kito batanyo kapado Ulama nan kito katahui dari ka tinggian ilimu baliau... nah dari situlah mako akan tajadi toleransi sasamo kito ummat Islam... bukan kito saliang salah manyalahan do... malu awak jo urang nan balain ugamo jo awak... kan Islam itu aratinyo salamaik mah... kalau awak basitegang dan bacakak-cakak dek gara-gara amalan tu, dima arati Islam (Salamaik) tu di awak... ndak kan salamaik awak beko tu doh...

Udin: aaa kok bantuak wa ang ko urang Islam ko sadoalah e Muin... aman dunia ko dek e mah...  kito memang  paralu saliang maharagoi. Sadangkan urang nan balain ugamo jo awak sajo, paralu awak haragoi, apolai awak nan samo-samo Islam ko, ndak bitu Muin...

Muin: aaa yo mode itu Din... kalau mode awak baduo ko badiskusi  elok-elok dan tanang-tanang, mako hikmah dari ilimu tu akan di curahkan oleh Allah Tuhan Yang Maha Kuaso ka awak ko mah Din... samakin nampak di awak kabanaran dari Ugamo awak ko nan alah di bao dan di ajakan sarato di pajuangkan oleh Baginda Rasulullah Muhammad SAW... Barakaik pajuangan baliau lah mako kito bisa mancaliak kabanaran nan hakiki tu...

Udin:  aaa ndak baitu doh muin, ko hari lah laruik juo mah, lah batanyo lo kabau ka padati mah Muin... kito urak selo ko lai... kito cari pa isi tabuang kulik kito lai... ndak buliah lapang lo kiro-kiro kito...

Muin: Molah Din...